Tuesday, February 14, 2012

ኢትዮጵያ ለግብጽ፦ ልጅ ስትኾን እናት!


ጉባኤ-ቃና

እመ-ኢያእመርኪ ግብጽ ቄርሎስሃ ርእሰኪ ፍጹመ
ኢትዮጵያ ትኩንኪ እንዘ-ወለትኪ እመ

ትርጕም

ግብጽ ሆይ! ፍጹም የኾነ ራስሽ ቄርሎስን ካላወቅሽ
ኢትዮጵያ ልጅሽ ስትኾን እናትን ትኹንሽ። 


Copt/Egypt! if thou know not Cyril, thyself, full of wonder,

Let Ethiopia be your mother, while daughter.


ጥቅስ

እመ ኢያእመርኪ ርእሰኪ ሠናይት እምአንስት...
ከከነዓን ሴቶች ይልቅ አምረሽ ተወደሽ ትኖሪ የነበረ ቤተ እስራኤል፦ ራስሽን እግዚአብሔርን ካላወቅሽ...
(መሓልይ 1፡8) 

ታሪክ 

አቡነ ተክለ-ሃይማኖትን ያመነኮሷቸው የደብረ-ሐይቁ አቡነ ኢየሱስ ሞዐ ነበሩ። ታዲያ ልጃቸው አቡነ ተክለ-ሃይማኖት ወደ ደብረ-ዳሞ ኼደው ሲመለሱ ለአባታቸው ለአቡነ ኢየሱስ ሞዐ ከደብረ-ዳሞው ከአባ ዮሐኒ ያመጡላቸውን አስኬማ ራሳቸው አንሥተው እንዲለብሱ ከመንበረ-እስጢፋኖስ ላይ ያስቀመጡላቸው መኾኑን ቢነግሯቸው፤ አቡነ ኢየሱስ ሞዐ እንዲህ ሲሉ መልሰውላቸው ነበር፦ 

 "እስመ-ኢይክል ሰብእ ነሢአ-ጸጋ ለሊሁ ዘእምቤሁ... ሀበኒ አንተ። እንዘ-ወልድየ ኩነኒ አቡየ።" (ሰው ለራሱ ከራሱ ጸጋ ሊቀበል አይችልምና... አንተ ስጠኝ/አልብሰኝ። ልጄ ስትኾን አባቴ ኹነኝ) ብለዋቸዋል።
(ገድለ-አቡነ ኢየሱስ ሞዐ)

ምስጢር

ዐሳባቸው ምድራዊ ግዛትን ለማስፋት ቃለ እግዚአብሔርን እንደፈለጉ መተርጎም ከኾነው ከሮማውያን፤ እንዲሁም እውነቱ ሳይጠፋቸው የንጉሥ ፈቃድ ለመፈጸም ሲሉ ሃይማኖታቸውን ከለወጡ ጽርኣውያን ጭምር ተለይታ "ወልድ ዋሕድ" በምትል መጽሐፍ ቅዱሳዊ ርትዕት ሃይማኖት ጸንታ የኖረችው ግብጽ፤ የገዛ ራሷን የቅዱስ ቄርሎስን ትምርት ችላ እያለችው ያለች ትመስላለች። ምናልባት ይህ ሊኾን የቻለው አገሪቱ በእስላሞች እጅ በመውደቋ የቄርሎስን ትምርት አስፋፍታ ለማስተማር ይቅርና ያንኑ የጥንቱን ቃል ስንኳ ጠብቃ ለመገኘት ባለመቻሏ ይኾናል። 

እንዲያ ከኾነ፤ በታላቁ በቅዱስ አትናቴዎስ አማካይነት ጳጳስ ሹማ ስለላከችላት እንደልጇ ትቆጥራት የነበረችው የኢትዮጵያ ቤተ ክርስቲያን የቅዱስ ቄርሎስን ትምርት አክብራ መያዝ ብቻ ሳይኾን፤ በትርጓሜ ገበታ አስፋፍታ ስታመሰጥረው ኖራለችና፤ ይቺ የኢትዮጵያ ቤተ ክርስቲያን በተራዋ ለግብጽ እንደ እናት ኾና ልታስተምራት ይገባል ማለታችን ነው! ምስጢረ-ተዋሕዶን።

ፍ.ታ.ፈ.

1 comment:

  1. It is a dream come true.I also want to learn Kine (quene). Pleas do something about it. Thank You. Bertu Bertu.

    ReplyDelete