Saturday, February 6, 2016

ለእመቦ እዝን ሰማኢ ዘቦ

በብሉይ፣ በሐዲስ ስለተመሠረተው ኢትዮጵያዊ ሥርዐተ-አምልኮ

በያግጣጫው ጩኸት! በምክንያትም ያለምክንያትም መደናቆር! እስከ ማእዜኑ/እስከ መቼ?
(ለእመቦ እዝን ሰማኢ ዘቦ = ምናልባት ሰሚ ጆሮ ያለው ቢገኝ፦ ድንቁ የቅኔ ፈጣሪ፣ የትርጓሜ ሊቅ /ብርሃን አድማሱ  ጀንበሬ በቅኔ መነሻነት ያሉትን እንስማ እስኪ፦)
………………………………………………………………………………………
ይህም በየቀኑ እንግዳ እንግዳ ድርሰት እየደረሱ ለእግዚአብሔር ምስጋና ማቅረብ በብሉይ በሐዲስ የታዛዘ ነው እንጂ፤ ልብ ወለድ ነገር አይደለም። ከምን ይገኛል ቢሉ?

በብሉይ ቅዱስ ዳዊት፦
ሰብሕዎ ለእግዚአብሔር ስብሐተ ሐዲሰ፤ እስመ-መንክር ግብረ-እግዚአብሔር።
እግዚአብሔርን እንግዳ ምስጋና አመስግኑት፤ የእግዚአብሔር ሥራ ድንቅ ነውና።( መዝ ፺፯፥፩)
ሰብሕዎ ለእግዚአብሔር ስብሐተ ሐዲሰ፤ ስብሐቲሁ በኅማበረ-ጻድቃኑ።
እግዚአብሔርን እንግዳ ምስጋና አመስግኑት፤ ይኸውም በነቢያት፣ በካህናት፣ በመላእክት ጉባዔ የሚመሰገነው ምስጋና ነው።( መዝ ፻፵፱፥፩) እያለ መላልሶ ተናግሯል።

በሐዲስም፦
ወይእዜኒ ሶበ ትትጋብኡ ኵልክሙ  ብክሙ መዝሙር  ወብክሙ ትምህርት ዘከሠተ አበይኖ ዘነገረ-በሐውርት  ወዘምድራሳት  ወኵሎ በዘትትሐነጹ ግበሩ ለበቊዔት
አሁንም ወንድሞቻችን ሆይ፥ ሁላችሁ በምትሰበሰቡበት ጊዜ መዝሙር  አላችሁ፤ ትምህርት አላቸሁ፤ መግለጥ  አላችሁ፤ በቋንቋ መናገር  አላችሁ፤ ሁሉም ለሚታነጽበት ጥቅም አድርጉት።( ፩ቆሮ ፲፬፥፳፮)

ይልቁንም ቅዱስ ጳውሎስ ኹላችሁ በተሰበሰባችሁ ጊዜ  በማለት ያስታወሰው ይህ ስብሰባ ለስብሐተ-ነግህ ለማሕሌት ለዋዜማ ለመወድስ [ለሰዓታት፣ ለቅዳሴ] በየጊዜው ከቤተ- ክርስቲያን የምንሰበሰበው ስብሰባ ነው =

(ብክሙ መዝሙር)  የሚለውም፦
ቅዱስ ያሬድ ምዕራፍ  በተባለው ክፍል በዜማ ያዘጋጃቸው መዝሙራተ ዳዊት  ናቸው
ገር ቋንቋ ተለይቶ የተገለጸ ትምህርት  አለላችሁ የሚለውም፦
ለዘመኑ ተስማሚ የኾነው ኀይለ- ቃል በይትበ ተለይቶ ተለይቶ በምዕራፍ መዝሙሮች ጣልቃ እየገባ የሚዘመረው የድጓ ትምህርት  ነው [ከዚህም ጋርከሐዋርያት አመክንዮ፣ ከሠለስቱ ምእት ጸሎተ- ሃይማኖት  ጀምሮ በሃይማኖተ-አበው እንዲሁም ባገራችን ሊቃውንት የተለያዩ ምዕላዳት ተወስኖ እና ተቀነባብሮ የተቀመጠ ትምህርተ-ሃይማኖት (doctrine)፤ይኸውም እየተራቀቀ የሚተረጎምበት የነጠላ፣ ያንድምታ፣ የምስጢር ትርጕም (interpretation)  አለንማለትም ይኾናል።]
ወዘምድራሳት  የሚለውም፦
ዕለት ዕለት ዐዲስ ድርሰት እየኾነ ከየሰው ልቡና ፈልቆ ከዳዊት መዝሙር እና ከያሬድ ድጓ ጋራ ተጣምሮ የሚዘመረውን ቅኔ  ነው ብንል የሚያኮራን ነው  እንጂ የሚያሳፍረን አይደለም።
 
ስብሐት ለክሙ  
ጊዜ ጸልዮ ሥላሴ በአእዛነ መንፈስ ርኂብ  
እለ ትሰምኡ ለኆሳሰ ልብ
ወትጸመሙ ብዝኀ ንባብ

 

No comments:

Post a Comment